| Dole ne malamai su hada kansu
Daga Yusuf Abdullah
Shaikh Ali Hasan Khazim, dan kungiyar Hizbullah daga Lebanon ya nuna matukar muhimancin tare da fa'idojin da ke tattare da hadin kan al'ummar musulmi, musamman ma malamai daga cikinsu. Ya bayyana hakan ne a lokacin da shi da abokinsa Shaikh Mahir suke ganawa da Malam Muhammad Turi a masaukinsu da ke otal din Kongo, Zariya. Shaikh Khazim ya yi cikakken bayani a kan cikakkiyar jituwar da ke akwai a tsakanin malamai mabiya mazhabobi mabambanta a Lebanon karkashin 'kungiyar Malamai', ta yadda Malamai ke da karfi da kuma ikon fada-a-ji matuka, ta yadda har gwamnati kan yi shahin ja da su, musamman saboda dimbin mabiyan da suke da su. Irin wannan kyakkyawar alaka da ke akwai a tsakanin malamai, akwai irinta a tsakanin sauran al'ummar musulmi na Shi'a da Sunni baki daya, ta yadda suke tafi da al'amuransu na aiki da karatu da kasuwanci da auratayya da ma sauran mu'amaloli baki daya tare.
Shi ma Shaikh Mahir ya yi karin haske ne a kan kyakkyawan halin zamantakewa da mu'amaloli da ke wanzuwa a wannan kasa. Sun yi nuni da cewa da 'yan matsaloli da akan samu nan da can a wasu lokutan. A jimlace dai mutum zai iya cewa komai falillahil hamd. Sun ma yi mamakin ganin rashin samuwar irin wannan kungiyar a nan, musamman da yake kasar cike take da musulmi.
A nasa bangaren Shaikh muhammad Mahmud Turi ya yi musu karin haske a kan yadda al'amura suke a kasar nan, musamman da yake akwai bambance-bambance tsakanin Nijeriya da kuma can Lebanon. Daga nan ne kuma Malam Muhammad Turi ya mika wasu tsarabobi ga wadannan baki, tsarabobin da suka hada da riguna dogwaye ga kowane dayansu da wandunansu dinkin mutanenmu na nan kasar tare da huluna da Alkur'ani mai tsarki rubutunmu na nan da kuma tafsirin Alkur'ani na Shaikh Abdullahi Gwandu da ake kira Dhiya'ut tawheed da kuma kayan sawa dogaye, huluna da kuma takalma. Dukkaninsu sun nuna matukar farin cikinsu da wadannan kyaututtuka, wadanda suka gwaggwada kuma suka yi musu daidai. A nan ne ma Shaikh Ali Hasan ya ce su zai sa ya yi khutuba ya kuma ba da sallar Juma'a da zarar ya koma, musamman da yake shi Limami ne a can. Bayan wannan muhawarar ne aka yi sallama da juna, inda suka jarraba Hausa da fadin "Mun gode muku."
|
